Mat 25 | NAS | STEP | “Tenang eeꞌnang tee tee muuꞌ paninung tee teing pinaꞌ neraiꞌ nanaiꞌ oroꞌparavaing biikaning daamunanka kompai nampeesinung kuneꞌkoo berouꞌning onkeonkeꞌaavaꞌnaang.

Matthew 25

Mirumiruꞌ Teing Neraiꞌ Nanaiꞌkoong

1 “Tenang eeꞌnang tee tee muuꞌ paninung tee teing pinaꞌ neraiꞌ nanaiꞌ oroꞌparavaing biikaning daamunanka kompai nampeesinung kuneꞌkoo berouꞌning onkeonkeꞌaavaꞌnaang. 2 Paꞌnokoꞌ teing-koo mutaanang-kooning eeꞌnoko paꞌnokoꞌ matau-poꞌning. 3 Teinge mutaanang-kooninge biikaang daamu nkavaama karasini nariꞌ nkavaavaruuꞌ. 4 Eeꞌnoko teinge matau-poꞌning karasininanka nariꞌ daamu-koo nkavai berouꞌ. 5 Teka tee nampeesinung poꞌkoo anaꞌaruꞌ. Anaꞌarioꞌ teing duunkaamparira aasiauꞌ. 6 Teketa meuꞌnamang boku karouꞌ aaꞌpuma, ‘Nampeesinung aung enang pomaang. Porira kuneꞌeriai.’ 7 Teketa teing neraiꞌ tantearira biikaning daamunanka pankaꞌpauꞌ. 8 Teketa teing mutaanang-kooninge teing matau-poꞌning karasini-koo eentavaarima aaꞌpauꞌ, ‘Niiꞌning pareꞌmereriai karasini-koo. Niikaning daamunanka siriꞌarining.’ 9 Makuꞌaama aaꞌpauꞌ, ‘A, niiꞌkoo aaꞌ ookara-koo makotuarooꞌnaang. Makosi berira karasini baaveaamaing-ankoa mooꞌsiiriaing.’ 10 Teka tenang mmeꞌ nanai otoroko karasini mooꞌkoo tee nampeesinung teꞌ basiaruꞌ. Eeꞌnoko teing neraiꞌ matau-poꞌning maamuariri otorokoꞌning tee ninka nariꞌ kuung tumpariruꞌ nampeesi-koong paroro-koo. Eeꞌnoko beroko karanaang daꞌparuꞌ. 11 Napoꞌ damaꞌke teing niiꞌning napoꞌ porora aaꞌpaakoꞌ, ‘Ovoring, ovoring, daateꞌmeriai.’ 12 Teka teie makuꞌurima aaꞌpuruꞌ, ‘Masikaꞌ naurampimang, ninge diiꞌ noruꞌdampiaꞌ.’ 13 Teeꞌkoo tanatarariri otorimaatoai diiꞌ, aiꞌ diiꞌke tee doong eeꞌnoko batei noruꞌeriaꞌ ning toromaravainooꞌ.”

Tee Mirumiruꞌ Mooniꞌ Tankaampuruꞌnaꞌkoong

(Luk 19:11-27)

14 “Napoꞌ tee muuꞌ paninung aunge minkunaae paara-anta-koo makosi. Narunge naninge ovoringe isipoꞌ niiꞌnameensiꞌkoo tenkenuma bakaning botovotonaaꞌnuka bokuvurira mooniꞌ tankaampuruꞌ teinge bakaang mooniꞌ tare-evaavaꞌnaang. 15 Tutunaꞌnung paꞌnokoꞌ kokoreiꞌnamiku avuuꞌ. Teketa kenaanka-nung kenaanka kokoreiꞌnamiku avuuꞌ. Teketa beenaumo-nung narung kokoreiꞌnamiku avuuꞌ. Biikaang matau siompui teeꞌ tankaampuruꞌ. Teketa tenkenuuꞌ. 16 Teketa tee paꞌnokoꞌ kokoreiꞌnamiku nkavuuꞌnung namuꞌke bera teie tee mooniꞌ mintoong-antavuuꞌ eeꞌnoko daua napoꞌ paꞌnokoꞌ kokoreiꞌ basi-antavuuꞌ. 17 Napoꞌ tee kenaanka kokoreiꞌnamiku nkavuuꞌnung bera teeꞌ nariꞌ nkoaruꞌ. Teie napoꞌ asiꞌning kenaanka kokoreiꞌnamiku basi-antavuuꞌ. 18 Teka teie naninge narung kokoreiꞌnamiku nkavuuꞌnunge bera kansiꞌ nenkeꞌura dinkung-koo dakoꞌuuꞌ tee mooniꞌ ovoring bakaang.

19 Teketa pankaroompuioꞌ tee teing biikaang ovoring toroarara baakeenevuruꞌ teing. 20 Eeꞌnoko teie naninge paꞌnokoꞌ kokoreiꞌnamiku nkavuuꞌnunge napoꞌ niiꞌning paꞌnokoꞌ kokoreiꞌnamiku poꞌantavuuꞌ nariꞌ pora aaꞌpuuꞌ, ‘Ovoring, dake tee ning paꞌnokoꞌ kokoreiꞌnamiku ameuꞌ. Ooveko ninge napoꞌ niiꞌning paꞌnokoꞌ kokoreiꞌ basi-antavantuꞌnung.’ 21 Bakaang ovoringe makuꞌuma aaꞌpuuꞌ, ‘Bakei tampaꞌ nkoveuꞌnung, daꞌ tee botovotonaaꞌ tampara, kakeꞌiinung. Aing-koo okiꞌning-koo tampaꞌ kakeꞌiiraruꞌnung-koo ninge tee kapooꞌnanka mmauꞌnanka tare-koo siꞌdampaing. Enang pora niꞌninka nariꞌ dotumareaing.’

22 Napoꞌ tee kenaanka kokoreiꞌnamiku nkavuuꞌnung pouꞌ. Pora aaꞌpuuꞌ tee ovoring, ‘Dake tee ning kenaanka kokoreiꞌnamiku ameuꞌ. Ooveko enang tee ninge napoꞌ asiꞌning kenaanka kokoreiꞌnamiku basi-antavantuꞌnung.’ 23 Bakaang ovoringe makuꞌuma aaꞌpuuꞌ, ‘Bakei tampaꞌ nkoveuꞌnung, daꞌ tee botovotonaaꞌ tampara, kakeꞌiinung. Aing-koo okiꞌning-koo tampaꞌ kakeꞌiiraruꞌnung-koo ninge tee kapooꞌnanka mmauꞌnanka tare-koo siꞌdampaing. Enang pora niꞌninka nariꞌ dotumareaing.’ 24 Teketa napoꞌ tee naning narung kokoreiꞌnamiku nkavuuꞌnung teꞌ pouꞌ. Pora aaꞌpuuꞌ, ‘Ovoring ee, daꞌ tee bakei naning ivekung noruꞌdansi oꞌnong. Dakaning botovotonaaꞌnuka poreꞌoromatoko damaꞌ pora derararaaꞌnaang. 25 Teeꞌkoo daꞌ dataramparura mera tee aung dakaang mooniꞌ bakuꞌantuꞌ kansiꞌkoo kuung. Ooveko, aung tee dakaang kapooꞌ.’ 26 Bakaang ovoringe makuꞌuma aaꞌpuuꞌ, ‘Daꞌ bakei orara botovotonaaꞌ, kakaruaꞌ. Teeꞌ minkumeinaare ninge enang toro-antavamaꞌnaang daꞌkoo. Masikaꞌ ee noruꞌmei otong ning naning ivekung? Nkaning botovotonaaꞌnuka poreꞌoromatoko damaꞌ mera deramaramaung ee? 27 Teeꞌ noruꞌmei deekoꞌ arekeeꞌkoo nkaang mooniꞌ beeng-koo sipearuuꞌ, toromarara nkaning taakoreꞌning ninka nkavampeuꞌnung? 28 Tee narung kokoreiꞌnamiku pariꞌerira tee naning kivora kokoreiꞌnamiku otoꞌevuing averiai. 29 Aiꞌ baa tee naning bereng-anta-nko dau basinaꞌ napoꞌ avuꞌkoong. Eeꞌnoko tee naning bereng-anta-nko deeaung teing otoꞌevuining naroꞌka pariꞌkoonge. 30 Enang damaꞌdu duaꞌeriai aung botovotonaaꞌ tamunsiꞌnung teꞌ mutaananooꞌ, teꞌ eeꞌnooꞌ nantoong biromparima siꞌdaꞌ dovang kakirinkuarimatoainooꞌ sisikeera-koo otoroi.’”

Jiisuuꞌke Damaꞌke Siivenkeꞌ Nkovuainaꞌ

31 “Tenang eeꞌnang tee ning Tee Naning-naumpoꞌ Paning-etaing nkaang meenasi ninka moainang teing ninka nkaning koosinunanka ninka nariꞌ ning tee tee-koo nkaang baꞌnavaꞌnaniꞌ pipiꞌdaari-koo paning-koong-koo baꞌnanampaing daurarong taaꞌniꞌantamari. 32 Eeꞌnoko ookara kansiꞌkoo muuꞌnanka amutemuuꞌ teing ning-koo uroꞌkanooꞌ oosiariaining eeꞌnoko teka siivenkeꞌarampaing teeꞌ sipisipiꞌ tarenarai sipisipiꞌ eeꞌnoko meeꞌmeeꞌ simpeꞌuripeuꞌnaꞌ. 33 Eeꞌnoko aaꞌnoai, sipisipiꞌnanka ning-koo tampavine-aape siparampai, meeꞌmeeꞌnanka mareꞌaanavine-aape. 34 Teketa tenang ninge dauraronge aaꞌparampaing teing tampavine-koo otoroaining, ‘Porira diiꞌ Mmaꞌke biraankeruruꞌning barenku konsiiriai, aiꞌ tee muuꞌ paninung tee diiꞌkoo maamu-antavuuꞌnung kansiꞌ tutumparuꞌnooꞌketa. 35 Aiꞌ diiꞌke tee ning tenang peeramoko bauꞌmerikoꞌ. Ntong-koo karaaꞌmarako kapooꞌ nai-koong amerikoꞌ. Tenang damisimai deemari oꞌnoko kuung bokumerikoꞌ. 36 Tenang duaana oꞌnoaruko duaamerikoꞌ. Napoꞌ siipamoko tanatamerikoꞌ. Tenang kiimatanava-koo oꞌnoko porima beeroꞌmerikoꞌ.’

37 “Teketa tenang teinge koontoꞌnukai makuꞌaama aaꞌpaavai tee, ‘Ovoring, areꞌka peeraroko oorampima bauꞌdampikoꞌ, eeꞌnoko ntong-koo nekeruꞌkiko kapooꞌ nai-koong arompikoꞌ? 38 Napoꞌ areꞌka damisimai deentari otoko oorampima kuung bokurampikoꞌ, eeꞌnoko areꞌka duaana otoꞌderuaruko duaantampikoꞌ? 39 Napoꞌ areꞌka siiparoko oorampima niiꞌnooꞌ kiimatanava-koo otoko beeroꞌdampikoꞌ?’ 40 Eeꞌnoko ninge dauraronge makuꞌarama aaꞌparampaing, ‘Masikaꞌ naurampimang diiꞌ, aming kapooꞌ diiꞌke aing-koo mmarang-koo baruꞌ miring otoroaing-koo nkoveruꞌnung tee tee ning-koo nkoveruꞌnung.’

41 “Napoꞌ aaꞌparampaing teing mareꞌaanavine-koo-nupoong, ‘Diiꞌ barakosiꞌnisinuka, beriai ning-ankoita tee-koo ntaꞌkoo otoi otoꞌkoo Sietaniꞌkoo eeꞌnoko bakaning koosinunanka-koo maamu-antanisi-koo. 42 Aiꞌ ning tee peeramoko diiꞌke bauꞌmeriarukoꞌ. Ntong-koo nekeruꞌkanko kapooꞌ nai-koong ameriarukoꞌ. 43 Damisimai deemari oꞌnoko kuung bokumeriarukoꞌ. Duaana-koo ataꞌteenko duaanameriarukoꞌ. Napoꞌ siipamoko eeꞌnoko kiimatanava-koo oꞌnoko diiꞌke tee ning taremeriarukoꞌ.’ 44 Eeꞌnoko teinge napoꞌ makuꞌaama aaꞌpaavai, ‘Ovoring ee, arenang niiꞌke daꞌ aaꞌnoko oorampima pakurampiarukoꞌ, peeraroko, ntong-koo nekeruꞌkiko, damisimai deentari otoko, duaana-koo ataꞌsiiko, siiparoko niiꞌnooꞌ kiimatanava-koo otoko?’ 45 Eeꞌnoko ninge makuꞌarama aaꞌparampai, ‘Masikaꞌ naurampimang, aming kapooꞌ diiꞌke aing-koo mmaikoriꞌkoo baruꞌ miring otoroaing-koo nkoveriaruuꞌnung tee tee ning-koo nkoveriaruuꞌnung.’ 46 Teketa tee teing kiimatavariri doong kante teeꞌ nariꞌ otoroainooꞌ beroaing, teka teing koontoꞌnuka domampariri teeꞌ nariꞌ otoroainooꞌ beroaing.”